警是個大佬丨羅子溢自封動作演員 敏奕自費置裝獲讚好Man.羅子溢與王敏奕今日（4日）在欣澳為無綫新劇《警是個大佬》（暫名）拍攝外景，兩人喺車內模擬撞車戲。子溢自封動作演員，劇中有多場打鬥場面，既要被追殺又要殺人，幸好拍攝時只有輕微擦傷，每日開工都好開心。雖然忙於拍劇，但子溢堅持湊小朋友，收工返屋企寧願唔休息都要送小朋友返學。近日假期佢同太太楊茜堯帶仔女去長洲，笑言好多人搭船似細個過關，主要想帶小朋友去張保仔洞感受自己以前嘅情懷。佢話湊仔係必需，費事老師問小朋友假期去咗邊但冇嘢講，又笑言冇佢陪太太未必咁有積極性。

林盛斌之前爆料敏奕為劇集自費置裝，敏奕笑稱：「佢爆咗我啲貪靚嘢，多謝監製畀空間我揀衫，希望做出嚟件事係睇到有用心。」至於花咗幾錢，佢話唔好講費事講到好勁但睇唔出，今日呢套係公司衫，佢置裝嘅衫同今日風格類似，因為劇中角色好有想法，所以設計一個style畀自己。敏奕飾演律師，雖然冇打戲但經常被打，佢大讚拍檔子溢：「佢好好經常保護我，乜都話佢做，唔使我做，好Man。」又指佢哋要去偏僻郊外同污糟後巷取景，怕蛇蟲鼠蟻嘅敏奕得子溢做開路先鋒幫手視察環境。TVB