丁子朗帶父母遊韓國享天倫 型佬爸爸意外搶Fo 感嘆時間不等人.丁子朗雖然近期頻繁穿梭香港與內地工作，但仍堅持抽時間陪家人。日前佢專登帶埋父母同幾個好朋友去韓國旅行，仲喺社交平台分享感人短片，反思同父母「交換角色」嘅心路歷程。丁子朗以「你多久沒有帶父母旅遊」為題，喺小紅書分享旅行Vlog，用普通話配音。佢坦言唔覺得旅行嘅風景有幾重要，因為到目前為止，自己記得嘅都係父母同好朋友嘅笑臉，佢會記一世，好感恩。

丁子朗又話，見到父母越來越多白頭髮，驚覺時光飛逝，感慨父母用咗成世陪佢長大，而家輪到佢陪父母變老：「佢哋睇風景，我睇佢哋，風景會變，但佢哋嘅笑容唔會。」佢感嘆父母其實要求唔多：「佢哋唔係要住五星級酒店，而係你肯慢落嚟，陪佢哋行一段路。哪怕只係短短三日兩夜，都足夠佢哋開心成個月。」短片中，丁爸丁媽表現恩愛，去到邊都拖住手，而且外型相當年輕。唔少網民大讚丁子朗孝順，更有人大讚丁爸戴黑超好有氣質，係「型佬」。