馬國明孖蕭正楠曹永廉佛山開騷.馬國明、蕭正楠同曹永廉昨晚（11日）喺佛山市南海體育館舉行《最佳拍檔神馬隊友音樂會》，吸引大批港劇迷專程到場支持。當中馬國明太太湯洛雯坐足頭排撐場，外父湯鎮宗亦有現身，力撐女婿。

三子合體又唱又跳，獻唱多首經典廣東歌，包括《最佳拍檔》《狂野之城》《我的親愛》《倒轉地球》《失戀》同《護花使者》等。三人分別著上紅、藍、綠三色戰衣上陣，笑稱係「TVB配色」，仲即場擠埋一齊「還原」TVB Logo，全場笑到爆。

到嘉賓環節，高海寧（高Ling）登場，同三子合唱《現代愛情故事》，又獨唱《Lemon Tree》，將氣氛推到更高。期間蕭正楠提到高Ling抱恙都堅持撐場，話要送擁抱，曹永廉同馬國明即上前阻止，互相提醒大家都係「人夫」。點知馬國明話自己「例外」，更大爆：「高Ling係唯一一個我喺TVB拍劇有親熱戲，唔使問我老婆嘅人，因為佢哋太Friend。」高Ling即時搞笑回應：「唔怪得近兩年你都係同我拍啦」，場面十分搞笑。除高Ling之外，麥長青亦擔任嘉賓，仲重現經典金句「吔屎啦梁非凡」，即時炒熱全場。

之後三子輪住獨唱，蕭正楠唱出《巨輪》《接受我》等作品，馬國明就獻唱《友情歲月》《一起走過的日子》。其後三人再度合體，大唱TVB劇集歌組曲，包括《紅蝴蝶》《連續劇》《越難越愛》《祝君好》《歲月如歌》《愛在記憶中找你》《義海豪情》，勾起觀眾一眾集體回憶。尾段三子以譚詠麟嘅《朋友》唱出彼此友情，演唱會喺一片溫馨感動之下完美落幕。TVB